Alin estudante sira hosi Escola Técnica Informática de Dili (ETI-DÍLI) termina ona sira nia estájiu durante fulan tolu (3) iha Sala Leitura Xanana Gusmão (SLXG).
Programa estájiu ne’e kada tinan Sala Leitura sempre simu estajiadu sira hodi prátika saida mak sira aprende ona iha sira nia eskola hodi mai aplika fali iha SLXG, iha tinan ida ne’e Sala Leitura simu estudante na’in sanulu (10) ho departamentu tolu (3) Técnico de Liguagem de Programação, Técnico de Gestão Equipamentos Informáticos, Técnico de Multimedia.
Durante estájiu estudante estajiadu sira aplika duni saida mak sira aprende iha eskola, ekipa Sala Leitura orienta sira ba iha espasu Muzeum, Biblioteka, Bebeteka no Audiovizual. Gestora Sala Leitura Maria Amaral Guterres hato’o lia menon ba estudante sira katak, “imi estájiu ona iha ne’e Sala Leitura konsidera ona imi hanesan família iha tempu saida de’it mak imi mai odamatan sempre nakloke ba imi no imi iha programa ruma hakarak implementa ami prontu apoiu”.
Iha tempu hanesan orientadór estudante nian husi ETI-DÍLI Profesór Bendito Soares hatutan no hato’o lia agradesimentu ba SLXG “reprezenta hosi eskola ETI-DÍLI hakarak hato’o ami nia agradesimentu ba ekipa Sala Leitura tanba bele simu ona ami nia estudante sira hodi hala’o sira nia estájiu, ida ne’e hanesan pasu importante tebes ba ami nia estudante sira hodi aplika fali matenek sira ne’ebé sira aprende ona. Ba oin ami sei nafatin lori estudante sira hodi mai estájiu iha fatin ne’e no ami espera ita-nia kolaborasaun ida ne’e kontinua beibeik hodi fó oportunidade ba ami nia estudante sira hodi bele mai estájiu”.
Reprezentante estajiadu sira hato’o mós sira nia agradesimentu “ami estudante na’in sanulu (10) hosi ETI-DÍLI ne’ebé durante hala’o estájiu durante fulan tolu (3) iha Sala Leitura hakarak hato’o agradese ba Gerente no estrutura tanba bele akompaña no orienta ona ami liu husi ida ne’e ami aprende esperiénsia lubuk ida husi fatin ne’e. Ida ne’e sai hanesan prezente furak ida ba ami atu bele kontinua karreira profisionál sira iha futuru oin mai.
Sala Leitura fó mós sertifikadu apresiasaun ba estajiadu sira hanesan rekoñesimentu ida ba sira durante estájiu.
Fontes Notísia: https://www.xananagusmaoreadingroom.com/en/termination-of-intern-of-the-school-tecnica-informatica-de-dili-eti-dili/
