Díli – Iha loron 8 Fulan Setembru Tinan 2025, Escola Técnica Informática de Díli (ETI) realiza Prova Aptidão Profissional (PAP) ba alunu sira hotu husi klase 12º anu. Ezame ne’e atu sukat alunu sira-nia abilidade no koñesimentu ne’ebé sira aprende ona durante tinan tolu iha Escola Técnica Informática de Díli.
Diretór ETI Dili Sr. João Gaio, iha nia diskursu hateten katak objetivu prinsipál husi ezame PAP ne’e atu fó oportunidade ba alunu sira atu hatudu sira-nia mentalidade no kreatividade hodi kria produtu ka prototipu rasik. Nune’e mos Diretór, Escola Técnica Informática de Díli husu estudante hotu tenki iha obrigasaun no dever hodi partisipa iha ezame Prova Aptidão profisionál tanba PAP eziste kedas iha kuríkulu nasionál ba ensinu sekunádiru tékniku vokasionál.
Ba tinan ida-ne’e, serimónia abertura ba ezame PAP hala’o iha Salaun ETI-Díli, ho prezensa husi reprezentante Ministériu Edukasaun liuhusi Diresaun Nasionál Ensinu Sekundáriu Tékniku Vokasionál (ESTV), Sr. Francisco da Costa Fernandes, hanesan Xefe Departamentu Asesu ba Kualidade iha ninia diskursu hateten katak bainhira aprende tenke implementa hodi halo ida ne’e sai hanesan aplikasaun moris loron-loron, hodi buka hatene moris realidade ida lolos no tau aktu ida ne’e sai hanesan essensial ida ne’e essensial tebes.
Alende ne’e mós, iha diskursu Xefe Departamentu Asesu Kualidade ESTV hateten katak atu sai rekursu umanu tékniku tenke buka hatene uluk no aprende hodi kria produtu ne’ebé suntentavél ba kresimentu ekonomiku sosiedade nian, ho nune’e bele sai joven útil no prontu kontribui ba dezenvolvimentu nasionál Timor-Leste.
Hafoin halo abertura kontinua kedas halo prezentasaun projetu husi grupu estudante Departamentu Tékniku Eletrónika nian, ho títulu Dispenser Otomátiku. Objetivu husi projetu ne’e atu aumenta ijene efisíensia no fasilita asesu ba be’e tanba evita kontaktu fíziku ho tornera atu nune’e labele transfere virus.
Estudante ne’ebé partisipa iha Ezame PAP refere, maihusi husi Departamentu 8 mak hanesan Técnico Linguagem de Programaçao (TLP), Técnico Gestão de Equimantos Informatícos (TGEI), Técnico de Multimédia (TM), Técnico de Eletricidade, Técnico de Eletrônica, Técnico de Construção Cívil (TCC) no Técnico de Hotelária e Turismo (THT).
